МУБОРАК ИДИ ФИТРАТ

Азизи ҷон, муборак иди фитрат,
Лабат хандон, муборак иди фитрат.
Падарҷони гиромӣ, модари ҷон,
Шавам қурбон, муборак иди фитрат.
Аё эй хоҳарам, эй додари хуб,
Бародарҷон, муборак иди фитрат.
Аё, эй духтарам, хуршеди бахтат
Бувад тобон, муборак иди фитрат.
Писарҷон, нури чашмонам ту бошӣ,
Бимон шодон, муборак иди фитрат.
Аё эй ҳамватан, ҳамсояи ман,
Ғамат поён, муборак иди фитрат.
Туро гар ман бидонам ё надонам,
Ба ҳар унвон, муборак иди фитрат.
Насибат рӯзгори бофароғат
Кунад Раҳмон, муборак иди фитрат.
Ба уқбо неъмати алвони ҷаннат
Диҳад чандон, муборак иди фитрат.
Насӯзад з-оташи сӯзони дӯзах
Туро домон, муборак иди фитрат.
Зи Ҳақ пайваста хоҳам, ҷони Наққош,
Туро имон, муборак иди фитрат.

Иброҳими НАҚҚОШ